សិទ្ធិក្នុងការរស់រានមានជីវិតនាយុគសម័យសន្តិភាពនៅក្នុងប្រទេសកម្ពុជា
ស្របពេលដែលយើងឈានចូលមកកាន់ខួបអនុស្សាវរីយ៍លើកទី៣២ នៃកិច្ចព្រមព្រៀងសន្តិភាពទីក្រុងប៉ារីស ខ្ញុំបាននឹករំពៃដល់គោលការណ៍ជាសកលដ៏សំខាន់ ដែលបានជំរុញឲ្យមានការបិទបញ្ចប់ជម្លោះឥតស្រាកស្រាន្តបំផុតមួយ នៅក្នុងតំបន់អាស៊ីអាគ្នេយ៍។ គោលការណ៍ជាសកលនេះ នៅតែបន្តក្រើនរំឭកអំពីកិច្ចខិតខំប្រឹងប្រែងរបស់យើងក្នុងការសម្រេចបាននូវសន្តិភាពនៅជុំវិញពិភពលោក។ សិទ្ធិក្នុងការរស់រានមានជីវិត គឺជាសិទ្ធិដំបូងបង្អស់មួយក្នុងចំណោមសិទ្ធិទាំងអស់របស់មនុស្ស ដែលមានតួនាទីចាំបាច់បំផុត ដើម្បីទទួលបានសិទ្ធិមនុស្សដែលមានចែងដទៃទៀត ព្រមទាំងក្តោបទៅលើសិទ្ធិដទៃទៀតដែរ។ សិទ្ធិនេះ ត្រូវតែទទួលបានការការពារដោយច្បាប់ ហើយគ្មាននរណាម្នាក់ត្រូវទទួលរងការបំពានលើអាយុជីវិតរបស់ខ្លួនឡើយ។
