នៅថ្ងៃទី១៤ ខែសីហា ឆ្នាំ២០២៥ អគារមរតកសង្គមរាស្ត្រនិយមសម្ដេចឪ សម្ដេចម៉ែ (បុរីអូរស្វាយ-សែនជ័យ) បានផ្ដល់ទីតាំងកិច្ចប្រជុំស្ដីពីការពិនិត្យលក្ខន្តិកៈ និងធ្វើបច្ចុប្បន្នភាពផលិតផលទេសចរណ៍ សម្រាប់សហគមន៍អេកូទេសចរណ៍បុរីអូរស្វាយ ដោយមានការចូលរួមពីតំណាងសហគមន៍ និងមន្ត្រីជំនាញសរុប១៤នាក់ ក្នុងនោះមានស្រ្តីចំនួន៤នាក់។ កិច្ចប្រជុំនេះគឺដើម្បីជំរុញវិស័យទេសចរណ៍សហគមន៍ឱ្យកាន់តែមានភាពរីកចម្រើន និងមានគុណភាពខ្ពស់ សម្រាប់មន្ទីរទេសចរណ៍ខេត្តស្ទឹងត្រែង។ គោលបំណងចម្បងនៃកិច្ចប្រជុំនេះ គឺដើម្បីពង្រឹងកិច្ចការគ្រប់គ្រងផ្ទៃក្នុងសហគមន៍ឱ្យកាន់តែមានប្រសិទ្ធភាព និងធ្វើបច្ចុប្បន្នភាពផលិតផលទេសចរណ៍ក្នុងរដូវវស្សា ឬ «រដូវកាលបៃតង»។ តាមរយៈកិច្ចប្រជុំ ក្រុមការងារបានពិភាក្សា និងពិនិត្យលម្អិតលើលក្ខន្តិកៈសហគមន៍ ដើម្បីធានាថាការអនុវត្តមានភាពត្រឹមត្រូវ និងស្របតាមបទដ្ឋានដែលបានកំណត់។
ចំពោះដំណើរការនៃការធ្វើបច្ចុប្បន្នភាពផលិតផលទេសចរណ៍ គឺផ្តោតលើការបង្កើត និងកែច្នៃសកម្មភាពថ្មីៗដែលឆ្លើយតបនឹងតម្រូវការភ្ញៀវទេសចរ ក្នុងរដូវវស្សា ដែលជាឱកាសល្អសម្រាប់ភ្ញៀវក្នុងការទស្សនាសោភណភាពធម្មជាតិដ៏ស្រស់បំព្រង។ អគារមរតកសង្គមរាស្ត្រនិយមសម្ដេចឪ សម្ដេចម៉ែ (បុរីអូរស្វាយ-សែនជ័យ) ក៏ជាទីតាំងចូលរួមចំណែកមួយដ៏សំខាន់ក្នុងការទាក់ទាញភ្ញៀវទេសចរឱ្យមកលេងកម្សាន្តនៅសហគមន៍បុរីអូរស្វាយគ្រប់រដូវកាល។ សហគមន៍អេកូទេសចរណ៍បុរីអូស្វាយ មានសក្ដានុពលខ្ពស់ផ្នែកទេសចរណ៍ធម្មជាតិ និងវប្បធម៌ ដែលបានរួមចំណែកយ៉ាងសកម្មក្នុងការលើកកម្ពស់ជីវភាពប្រជាពលរដ្ឋក្នុងតំបន់។ ការរៀបចំកិច្ចប្រជុំនេះ គឺជាសក្ខីភាពបញ្ជាក់ពីការប្តេជ្ញាចិត្តរបស់ក្រសួងទេសចរណ៍ និងសហគមន៍ ក្នុងការអភិវឌ្ឍន៍វិស័យទេសចរណ៍ប្រកបដោយនិរន្តរភាព និងគុណភាព។
អត្ថបទ៖ ស្រេង លីដា បុគ្គលិកមជ្ឈមណ្ឌលឯកសារខេត្តស្ទឹងត្រែង
រូបថត ៖ បណ្ណសារមជ្ឈមណ្ឌលឯកសារកម្ពុជា
