ក្រុមការងារមជ្ឈមណ្ឌលផ្សះផ្សាវាលវែង និងមជ្ឈមណ្ឌលឯកសារកម្ពុជា រួមមាន៖ លោក ឡុង ដានី, អ្នកស្រី គឹម សុវណ្ណដានី, លោក សុខ វណ្ណៈ, លោក ធី គឹមហុង, លោក ចាន់ ណារិទ្ធ, កញ្ញា មឿង ស្រីណុច,កញ្ញា ឡាំ ស្រីនីត និងក្រុមវេជ្ជបណ្ឌិតបម្រើការងារនៅមន្ទីរពេទ្យ ខេវី បានរៀបចំពិនិត្យសុខភាពបឋមជូនព្រះសង្ឃ ជនពិការ អ្នករស់រានមានជីវិតពីរបបខ្មែរក្រហម ចំនួន២២០នាក់ នៅភូមិចំនួន៣ គឺភូមិដីក្រហម ឃុំអន្លង់រាប ស្រុកវាលវែង ភូមិក្រពើពីរក្រោម ឃុំក្រពើពីរ ស្រុកវាលវែង និងភូមិសំរោងទី២ ឃុំសំរោង ស្រុកភ្នំក្រវ៉ាញ ខេត្តពោធិ៍សាត់។ អ្នករស់រានមានជីវិតទាំងអស់ធ្លាប់ផ្ដល់បទសម្ភាសន៍ អំពីបញ្ហាផ្នែកសុខភាព និងរឿងរ៉ាវដែលធ្លាប់បានឆ្លងកាត់ក្នុងរបបខ្មែរក្រហម (១៩៧៥-១៩៧៩) មកកាន់អ្នកស្ម័គ្រចិត្តនៃមជ្ឈមណ្ឌលផ្សះផ្សាវាលវែង។ ដំណើរការនៃការពិនិត្យសុខភាពជូនអ្នករស់រានមានជីវិតពីរបបខ្មែរក្រហម គឺមានរយៈពេលពីរថ្ងៃ គឺថ្ងៃទី១៦ ដល់ ថ្ងៃទី១៧ ខែមករា ឆ្នាំ២០២៤។
សម្រាប់ថ្ងៃទី១៦ ក្រុមការងារមជ្ឈមណ្ឌលផ្សះផ្សាវាលវែង និងក្រុមវេជ្ជបណ្ឌិតនៃមន្ទីរពេទ្យ ខេវី បានរៀបចំពិនិត្យសុខភាពជូនអ្នករស់រានមានជីវិតពីរបបខ្មែរក្រហមចំនួន១១៨ នាក់ ស្ថិតក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។ បន្ទាប់ពីពិនិត្យសុខភាពរួចរាល់ ក្រុមវេជ្ជបណ្ឌិតបានរកឃើញថា អ្នករស់រានមានជីវិតពីរបបខ្មែរក្រហមនៅក្នុង ភូមិដីក្រហម ប្រមាណជា៩៥ភាគរយ មានជំងឺប្រចាំកាយ ដូចជា ជំងឺលើសសម្ពាធឈាម ជំងឺទឹកនោមផ្អែម ជំងឺក្រពះពោះវៀន ជំងឺលើសជាតិអាស៊ីត ជំងឺសន្លាក់ និងជំងឺផ្លូវចិត្តជាដើម។ លោកវេជ្ជបណ្ឌិត ឡាវ ហាវ៉ាន មានប្រសាសន៍ថា «អ្នករស់រានមានជីវិតពីរបបខ្មែរក្រហមភាគច្រើនលើសលប់មានជំងឺលើសសម្ពោធឈាម ឯជំងឺទឹកនោមផ្អែមឈរនៅលំដាប់ទី២។ បន្ទាប់មកគឺជំងឺក្រពះពោះវៀន ជំងឺលើសអាស៊ីត និងជំងឺសន្លាក់»។ អ្នករស់រានមានជីវិតពីរបបខ្មែរក្រហមមួយចំនួន គឺជាជនពិការមានបញ្ហាសុខភាពធ្ងន់ធ្ងរ ដោយសារផលប៉ះពាល់នៃពិការភាពកាលពីសម័យសង្គ្រាម។ ក្នុងនោះក៏មានអ្នករស់រានមានជីវិតពីរបបខ្មែរក្រហមមួយចំនួនមានជំងឺផ្លូវចិត្តដូចជាជំងឺធ្លាក់ទឹកចិត្ត និងជំងឺបាក់ស្បាតជាដើម។
សម្រាប់ថ្ងៃទី១៧ ក្រុមការងារមជ្ឈមណ្ឌលផ្សះផ្សាវាលវែង និងក្រុមវេជ្ជបណ្ឌិតបានរៀបចំពិនិត្យសុខភាពជូនអ្នករស់រានមានជីវិតពីរបបខ្មែរក្រហមចំនួន១០២នាក់ នៅភូមិក្រពើពីរក្រោម ឃុំក្រពើពីរ ស្រុលវាលវែង និងភូមិសំរោងទី២ ឃុំសំរោង ស្រុកភ្នំក្រវ៉ាញ ខេត្តពោធិ៍សាត់។ ក្រោយពីពិនិត្យសុខភាពរួចរាល់ទាំង ១០២នាក់ មក ក្រុមវេជ្ជបណ្ឌិតបានរកឃើញថាអ្នករស់រានមានជីវិតពីរបបខ្មែរក្រហម នៃស្រុកទាំងពីរខាងលើមានជំងឺប្រចាំកាយស្រដៀងនឹងអ្នករស់រានមានជីវិតរបបខ្មែរក្រហមនៅភូមិដីក្រហមដែរ គឺជំងឺលើសសម្ពាធឈាម ជំងឺទឹកនោមផ្អែម ជំងឺក្រពះពោះវៀន ជំងឺលើសអាស៊ីត ជំងឺសន្លាក់ជាដើម។ លោកវេជ្ជបណ្ឌិត ឡុង ម៉ារ៉ាដែន បានផ្ដល់របាយការណ៍ជាបឋមថា «អ្នករស់រានមានពីជីវិតពីរបបខ្មែរក្រហមមានជំងឺដូចបានរៀបរាប់ខាងលើ គឺភាគច្រើនដោយសារផលប៉ះពាល់មកពីរបបខ្មែរក្រហម វ័យចាស់ជរា និងរបៀបរបបរស់នៅប្រចាំថ្ងៃរបស់ពួកគាត់ ដូចជាការហូបអាហារមានរស់ជាតិផ្អែមខ្លាំង ប្រៃខ្លាំង ហូបអាហារផ្អាប់ទុកយូរដែលប្រើប្រាស់អំបិលច្រើន ភេសជ្ជៈកំប៉ុងដែលកម្រិតជាតិស្ករខ្ពស់ជាដើម»។
បន្ទាប់ពីបញ្ចប់កម្មវិធីពិនិត្យសុខភាពលោកវេជ្ជបណ្ឌិត ឡាវ ហាវ៉ាន និងលោកវេជ្ជបណ្ឌិត ឡុង ម៉ារ៉ាដែន បានណែនាំឲ្យអ្នករស់រានមានជីវិតពីរបបខ្មែរក្រហម ត្រូវផ្លាស់ប្តូររបបអាហារ ដូចជា ការកាត់បន្ថយការហូបប្រៃ ហូបផ្អែម តបផឹកស្រា និងឈប់ជក់បារី។ ម៉្យាងទៀតសូមឲ្យអ្នកជំងឺពិសារថ្នាំតាមវេជ្ជបញ្ជាឲ្យបានត្រឹមត្រូវ និងត្រូវទៅពិនិត្យសុខភាពនៅតាមមណ្ឌលសុខភាព ឬមន្ទីរពេទ្យណាមួយឲ្យបានទៀតទាត់។
នៅចុងបញ្ចប់នៃកម្មវិធីទាំងពីរថ្ងៃ អ្នករស់រានមានជីវិតរបបខ្មែរក្រហមបង្ហាញចំណាប់អារម្មណ៍ដូចខាងក្រោម ៖
ខ្ញុំបាទឈ្មោះ ង៉ែត យ៉ុន មានអាយុ៥៨ឆ្នាំ បច្ចុប្បន្នរស់នៅក្នុងភូមិដីក្រហម ឃុំអន្លង់រាប ស្រុកវាលវែង ខេត្តពោធិ៍សាត់។ ខ្ញុំពិតជាមានអារម្មណ៍សប្បាយរីករាយដែលខាងមជ្ឈមណ្ឌលផ្សះផ្សាវាលវែង បានអញ្ជើញក្រុមគ្រូពេទ្យមកពិនិត្យសុខភាពដល់ខ្ញុំ និងប្រជាជនដែលរស់នៅក្នុងភូមិដីក្រហម ដែលអាចឲ្យខ្ញុំនិងប្រជាជនឯទៀតបានដឹងច្បាស់ថាខ្លួនកំពុងកើតមានជំងឺអ្វី ដើម្បីព្យាបាលទប់ស្កាត់ជំងឺនេះកុំឲ្យវិវឌ្ឍន៍ទៅជាធ្ងន់ធ្ងរ។ ខ្ញុំសូមថ្លែងអំណរគុណយ៉ាងខ្លាំងដល់ខាងក្រុមគ្រូពេទ្យ ក្រុមការងាររបស់មជ្ឈមណ្ឌលផ្សះផ្សាវាលវែង និងក្រុមការងាររបស់មជ្ឈមណ្ឌលឯកសារកម្ពុជាទាំងអស់ សូមជួបតែសំណាងល្អ និងសុខភាពល្អទាំងអស់គ្នា។
នាងខ្ញុំឈ្មោះ ហែម ភាន់ គឺជាមេភូមិក្រពើពីរក្រោម ខ្ញុំពិតជាមានសេចក្ដីរីករាយជាខ្លាំង ដែលមានក្រុមគ្រូពេទ្យបានមកពិនិត្យសុខភាពប្រជាជនក្នុងភូមិខ្ញុំ។ ប្រជាជនក្នុងភូមិខ្ញុំមិនដែលបានពិនិត្យសុខភាពជុំគ្នាច្រើនបែបនេះទេ វាជាការជួបជុំដ៏ល្អមួយក្នុងយល់ដឹងពីសុខភាព ហើយក៏មានការណែនាំពីក្រុមគ្រូពេទ្យ។ ជាចុងក្រោយខ្ញុំសូមថ្លែងអំណរគុណដល់ក្រុមការងាររបស់មជ្ឈមណ្ឌលឯកសារកម្ពុជាដែលបានចុះមកសម្ភាសន៍ប្រជាជនក្នុងភូមិខ្ញុំ ហើយប្រជាជនទទួលបានការពិនិត្យសុខភាព។ ខ្ញុំសូមជូនពរមជ្ឈមណ្ឌលឯកសារកម្ពុជាឲ្យទទួល ជោគជ័យជារៀងរហូត។
ខ្ញុំឈ្មោះ តែម អ៊ីប គឺជាអ្នករស់រានមានជីវិតពីសម័យខ្មែរក្រហម។ បច្ចុប្បន្នខ្ញុំរស់នៅក្នុងភូមិសំរោង២ ឃុំសំរោង ស្រុកភ្នំក្រវាញ ខេត្តពោធិ៍សាត់។ ខ្ញុំពិតជាមានអារម្មណ៍សប្បាយរីករាយក្រោយពីបានចូលរួមពិនិត្យសុខភាព ព្រោះបានក្រុមគ្រូពេទ្យយកចិត្តទុកដាក់ណែនាំពីសុខភាព និងដឹងពីបញ្ហាសុខភាព ឬលើសសម្ពាធឡើង។ ក្រុមការងារមានទំនាក់ទំនងល្អជាមួយអ្នកភូមិ ព្រមទាំងបានជជែកពីរឿងសុខភាព និងរំឭកពីរឿងរ៉ាវដែលបានឆ្លងកាត់ក្នុងសម័យខ្មែរក្រហមជាមួយអ្នកភូមិផ្សេងទៀត។ ខ្ញុំសូមអរគុណដល់មជ្ឈមណ្ឌលឯកសារកម្ពុជាដែលបានឲ្យគ្រូពេទ្យចុះមកពិនិត្យសុខភាពជូនអ្នកភូមិរបស់ខ្ញុំ។
អត្ថបទ៖ ឡុង ដានី នាយកមជ្ឈមណ្ឌលផ្សះផ្សាវាលវែង
រូបថត ៖ បណ្ណសារមជ្ឈមណ្ឌលឯកសារកម្ពុជា
