កាកបាទក្រហមកម្ពុជា ក្រោមម្លប់គង់ប្រថាប់ដ៏ឧត្ដុង្គឧត្តមនៃសម្តេចព្រះមហាក្សត្រី ព្រះវររាជមាតាជាតិខ្មែរ ជាព្រះប្រធានកិត្តិយសជាទីគោរពសក្ការៈដ៏ខ្ពង់ខ្ពស់បំផុត និងក្រោមការដឹកនាំប្រកបដោយគតិបណ្ឌិតរបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងតែយកចិត្តទុកដាក់គិតគូរពីសុខទុក្ខរបស់បងប្អូនប្រជាជនងាយរងគ្រោះបំផុត និងប្រជាជនរងគ្រោះដោយគ្រោះមហន្តរាយ ឬវិបត្តិភ័យផ្សេងៗ ដោយគ្មានការរើសអើង តាមពាក្យស្លោក «ទីណាមានទុក្ខលំបាក ទីនោះមានកាកបាទក្រហមកម្ពុជា»។
ជាក់ស្តែង ឆ្លើយតបតម្រូវការបន្ទាន់របស់ប្រជាជនងាយរងគ្រោះបំផុត និងតាមការស្នើសុំរបស់សាខាកាកបាទក្រហមកម្ពុជាខេត្តស្ទឹងត្រែង នៅព្រឹកថ្ងៃទី១៧ ខែវិច្ឆិកា ឆ្នាំ២០២៥នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា និងឯកឧត្តម សរ សុពុត្រា ប្រធានគណៈកម្មាធិការសាខាកាកបាទក្រហមកម្ពុជាខេត្តស្ទឹងត្រែង និងមានការអញ្ជើញចូលរួមពីឯកឧត្តម ផៃ ប៊ុនឈឿន ប្រធានកិត្តិយសសាខាកាកបាទក្រហមកម្ពុជាខេត្តស្ទឹងត្រែង បានចុះសំណេះសំណាលសួរសុខទុក្ខ និងផ្តល់អំណោយមនុស្សធម៌ជូនប្រជាជនងាយរងគ្រោះបំផុតចំនួន៥០៣គ្រួសារ មកពីភូមិចំនួន២២ ឃុំចំនួន៣ នៃស្រុកបុរីអូរស្វាយសែនជ័យ ខេត្តស្ទឹងត្រែង។
ក្នុងឱកាសនោះឯកឧត្តមអគ្គលេខាធិការរងទី២ បានពាំនាំនូវព្រះរាជសវនីយ៍របស់ សម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយស ជាទីគោរពសក្ការៈដ៏ខ្ពង់ខ្ពស់បំផុត និងប្រសាសន៍របស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ដែលផ្តាំផ្ញើសួរសុខទុក្ខ ក្តីនឹករឭក អាណិត ស្រឡាញ់ដ៏ជ្រាលជ្រៅជាមួយលោកយាយលោកតា បងប្អូនប្រជាជនងាយរងគ្រោះទាំងអស់ រួមជាមួយការគិតគូរអំពីសុខទុក្ខ និងជីវភាពរស់នៅប្រចាំថ្ងៃ គ្រប់ពេលវេលា គ្រប់ទីកន្លែង។
ទន្ទឹមនឹងការគិតគូរពីជីវភាព តាមរយៈឯកឧត្តម យូ ឡាណា, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក៏បានផ្តាំផ្ញើដល់បងប្អូនប្រជាជនទាំងអស់សូមយកចិត្តទុកដាក់ថែទាំសុខភាពឱ្យបានល្អ ដោយត្រូវផ្លាស់ប្តូរឥរិយាបថក្នុងការស់នៅ និងការហូបចុក ដោយត្រូវមានអានាម័យជាប់ជានិច្ច ពិសាទឹកដាំពុះ និងត្រូវស្រឡាញ់ខ្លួនឱ្យស្ងួនចំណី ដើម្បីជៀសផុតពីជំងឺមិនឆ្លងសំខាន់ចំនួន៤ ដូចជា៖ ជំងឺទឹកនោមផ្អែម ជំងឺបេះដូង ស្ទះសរសៃឈាម ជំងឺមហារីក និងជំងឺរលាកផ្លូវដង្ហើមរាំរ៉ៃ ដែលបាននិងកំពុងប្រឈមក្នុងចំណោមប្រជាពលរដ្ឋទូទៅនាពេលបច្ចុប្បន្ន តាមរយៈការបរិភោគមិនបានត្រឹមត្រូវដូចជាផ្អែមពេក ប្រៃពេក ខ្លាញ់ពេក អាហារកំប៉ុងច្រើនពេក ការផឹកគ្រឿងស្រវឹង និងការជក់បារីជាដើម។
ជាមួយគ្នានេះដែរ សូមប្រជាជនទាំងអស់ត្រូវដេកក្នុងមុងជាប់ជានិច្ចដើម្បីការពារពីជំងឺគ្រុនឈាម ព្រោះនៅក្នុងកញ្ចប់ដែលជាអំណោយរបស់កាកបាទក្រហមកម្ពុជា មានមុងស្រាប់ដែលបានចែកជូននាពេលនេះ ជាមួយគ្នានេះសូមសម្អាតអនាម័យបរិស្ថានឱ្យបានស្អាត ទុកដាក់សំរាមឱ្យបានត្រឹមត្រូវ លុប ជម្រកមូសខ្លាដែលជាប្រភពចម្លងជំងឺគ្រុនឈាម។
ដោយឡែកក្នុងនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាឥស្សរជនឆ្នើមថ្នាក់ជាតិ ដែលគោរមងារទាំងពីរទទួលបានពីអង្គការសហប្រជាជាតិ បានអំពាវនាវសូមបងប្អូនជាស្ត្រីមានផ្ទៃពោះ ស្ត្រីទើបសម្រាលកូន និងស្ត្រីមានកូនតូច បង្កើនការយកចិត្តទុកដាក់ថែទាំសុខភាពឱ្យបានល្អ ទាំងសុខភាពផ្លូវចិត្ត និងផ្លូវកាយចំពោះស្ត្រីមានផ្ទៃពោះសូមទៅពិនិត្យផ្ទៃពោះឱ្យបានទៀងទាត់យ៉ាងតិចណាស់ឱ្យបាន៤ដងមុនពេលសម្រាល ហើយត្រូវទៅសម្រាលកូននៅមណ្ឌលសុខភាព ឬមន្ទីរពេទ្យដែលនៅជិតបំផុត ដើម្បីសុវត្ថិភាពទាំងម្តាយ និងកូនជៀសផុតពីគ្រោះថ្នាក់ផ្សេងៗ និងការចម្លងជំងឺពីម្តាយទៅកូនពិសេសជំងឺអេដស៍។ ចំពោះស្ត្រីដែលទើបសម្រាលកូនរួចសូមទៅពិនិត្យសុខភាព ពិសេសនាំកូនទៅទទួលថ្នាំបង្កាឱ្យបានគ្រប់ចំនួន ដើម្បីឱ្យកូនមានសុខភាពល្អជៀសផុតពីជំងឺផ្សេងៗ។ មួយវិញទៀតសូមអាណាព្យាបាលគ្រប់រូបដែលមានកូនតូចត្រូវប្រុងប្រយ័ត្នកុំឱ្យកូនផឹកគ្រឿងកំប៉ុងដែលមានជាតិផ្អែមច្រើន ពីព្រោះថាភេសជ្ជៈទាំងនេះមិនល្អសម្រាប់សុខភាពកុមារ។
តំណាងឱ្យប្រជាពលរដ្ឋដែលទទួលបានការយកចិត្ដទុក្ខដាក់ពីថ្នាក់ដឹកនាំ ឯកឧត្តម សរ សុពុត្រា បានថ្លែងពីការយកចិត្តទុកដាក់គិតគូរចំពោះសុខទុក្ខរបស់បងប្អូនប្រជាពលរដ្ឋទាំងអស់ពី សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាប្រមុខរាជរដ្ឋាភិបាលដែលដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដែលតែងតែគិតគូរយកចិត្តទុកដាក់ចំពោះសុខទុក្ខរបស់បងប្អូនប្រជាពលរដ្ឋ ដោយមិនទុកនរណាម្នាក់ចោលឡើយ ទោះស្ថិតក្នុងកាលៈទេសៈណាក៏ដោយ។
ជាងនេះទៅទៀត គឺការយកចិត្ដទុកដាក់ពីអ្នកម្ដាយមនុស្សធម៌ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន បានធ្វើឱ្យប្រជាពលរដ្ឋមានភាពកក់ក្ដៅជាខ្លាំង និងបានសម្ដែងនូវការថ្លែងអំណរគុណយ៉ាងជ្រាលជ្រៅ ចំពោះទឹកចិត្ដដ៏មហាសប្បុរស និងមេត្ដាធម៌គ្មានព្រំដែនរបស់សម្ដេចកិត្ដិព្រឹទ្ធបណ្ឌិត គឺបានជួយសម្រាលទាំងការលំបាកដែលប្រជាពលរដ្ឋបានជួបភ្លាមៗ រួមទាំងសុខភាពផ្លូវកាយ និងផ្លូវចិត្ដ។
សូមជម្រាបថានៅថ្ងៃទី១៧ ខែវិច្ឆិកា ឆ្នាំ២០២៥ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន បានចាត់ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា និងសហការស្នាក់ការកណ្ដាលជាច្រើនរូប ចុះសំណេះសំណាលសួរសុខទុក្ខ និងផ្ដល់អំណោយសម្រាលការលំបាកដល់ប្រជាពលរដ្ឋចំនួន១,០១៥គ្រួសារ។ ពិធីជួបសំណេះសំណាល សួរសុខទុក្ខ និងចែកអំណោយខាងលើនេះ បានប្រព្រឹត្តទៅនៅទីតាំងចំនួន២៖ ទី១) នៅភូមិអូរស្វាយ ឃុំអូរស្វាយ សម្រាប់ប្រជាជនងាយរងគ្រោះបំផុត៥០៣គ្រួសារ មកពីភូមិចំនួន២២ ឃុំចំនួន៣ នៃស្រុកបុរីអូរស្វាយសែនជ័យ និងទី២) ប្រព្រឹត្ដទៅនៅភូមិស្រែក្រសាំង ឃុំស្រែក្រសាំង សម្រាប់ប្រជាជនងាយរងគ្រោះបំផុត៥១២គ្រួសារ មកពីភូមិចំនួន១៧ ឃុំចំនួន៧ នៃស្រុកសៀមបូក ខេត្ដស្ទឹងត្រែង ដោយភ្ជាប់មកនូវជាមួយអំណោយមនុស្សធម៌ដែលប្រជាជនយើងទទួលបាន ក្នុងមួយគ្រួសារ គឺអង្ករ ៣០គីឡូក្រាម, មី១កេស, ត្រីខ១០កំប៉ុង, ទឹកស៊ីអ៊ីវ៦ដប និងកញ្ចប់១ ក្នុងនោះមាន មុង ភួយ សារុង និង ក្រមា។
បន្ទាប់ពីការចុះសំណេះសំណាលសួរសុខទុក្ខ និងផ្តល់អំណោយមនុស្សធម៌ជូនប្រជាជនងាយរងគ្រោះបំផុត, ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា និងប្រតិភូ អញ្ជើញធ្វើទស្សនកិច្ចមកកាន់ស្ដូបព្រះបរមរតនកោដ្ឋ និងអគារមរតកសង្គមរាស្រ្តនិយម សម្ដេចឪ-សម្ដេចម៉ែ (បុរីអូរស្វាយ-សែនជ័យ) ដែលជាសាខារបស់ព្រះរាជបណ្ណាល័យហ្លួងម៉ែ នៃមជ្ឈមណ្ឌលឯកសារកម្ពុជា។ ឯកឧត្តមអគ្គលេខាធិការរងទី២កាកបាទក្រហមកម្ពុជា និងប្រតិភូបានទស្សនាពិព័រណ៍ព្រះបរមឆាយាល័ក្ខ ណ៍, បណ្ណាល័យ និងគម្រោងអភិវឌ្ឍន៍សហគមន៍បុរីអូរស្វាយសែនជ័យ។
ឯកឧត្តមអគ្គលេខាធិការរងទី២កាកបាទក្រហមកម្ពុជា បង្ហាញចំណាប់អារម្មណ៍ថា៖ «ក្នុងនាមក្រុមការងារមនុស្សធម៌របស់កាកបាទក្រហមកម្ពុជា ដែលបាននាំយកអំណោយមនុស្សធម៌មកចែកជូនប្រជាពលរដ្ឋងាយរងគ្រោះនៅស្រុកបុរីអូរស្វាយសែនជ័យ យើងខ្ញុំមានសេចក្ដីសោមនស្សរីករាយ និងរំភើបយ៉ាងខ្លាំង ដោយបានចូលទស្សនាអគារមរតកសង្គមរាស្រ្តនិយម សម្ដេចឪ-សម្ដេចម៉ែ (បុរីអូរស្វាយ-សែនជ័យ)។ ការទស្សនានេះ បានផ្ដល់នូវការយល់ដឹងអំពីឯកសារសំខាន់ៗ និងការកសាងសហគមន៍តាំងពីទសវត្សរ៍ទី៦០។ នេះពិតជាតឹកតាងប្រវត្តិសាស្ត្រនៃសមិទ្ធផល ព្រះបរមរតនកោដ្ឋ»។
អត្ថបទ៖ ស្រេង លីដា បុគ្គលិកមជ្ឈមណ្ឌលឯកសារខេត្តស្ទឹងត្រែង
រូបថត ៖ បណ្ណសារមជ្ឈមណ្ឌលឯកសារកម្ពុជា
