នៅថ្ងៃពុធ ទី១៣ ខែសីហា ឆ្នាំ២០២៥ បុគ្គលិកមជ្ឈមណ្ឌឯកសារខេត្តកំពង់ចាម ចំនួនពីររូបគឺ លោក លី ដេវីត និងលោក សាំង ចាន់ធូ បានចូលរួមវេទិកាសន្ទនាស្តីពី «កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាព អង្គការសង្គមស៊ីវិលក្នុងបរិបទថ្មី» ដែលរៀបចំឡើងដោយ វេទិកាសម្ព័នសង្គមស៊ីវិល (វ.ស.ស) ក្រោមអធិបតេយ្យភាព ឯកឧត្ដម កឹមរ័ត្ន វិសិដ្ឋ នាយករងខុទ្ធល័យសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ប្រធានក្រុមប្រឹក្សាភិបាល វ.ស.ស. និង ឯកឧត្ដម អ៊ុន ចាន់ដា អភិបាលនៃគណៈអភិបាលខេត្ត និងមានការចូលរួមពីអភិបាលរង នៃគណៈអភិបាលខេត្តកំពង់ចាម និងត្បូងឃ្មុំ មន្ទីរអង្គភាពជុំវិញ ប្រធាន និងតំណាងអង្គការ សមាគម សហជីព និងសហគមន៍ ទូទាំងខេត្តកំពង់ចាម និងត្បូងឃ្មុំសរុបប្រមាណជាង១១៤នាក់ អញ្ជើញចូលរួម។
ជាកិច្ចចាប់ផ្ដើមនៃវេទិកាឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានឡើងផ្ដល់នូវមតិស្វាគមន៍ និងផ្តល់ជាយោបល់ណែនាំដល់អង្គពិធី។ ឯកឧត្តមអភិបាលខេត្ត បានសម្ដែងនូវការអរគុណដល់អង្គការ សមាគម សហជីព និងសហគមន៍ ទាំងអស់ដែលបានរួមចំណែកក្នុងការអភិវឌ្ឍន៍និងបម្រើជាប្រយោជន៍រួមដល់ប្រជាជនទាំងអស់នៅក្នុងមូលដ្ឋានខេត្តកំពង់ចាម ស្របតាមផែនការយុទ្ធសាស្រ្តរបស់រាជរដ្ឋាភិបាលកម្ពុជាអាណត្តិទី៧។ ឯកឧត្តម អ៊ុន ចាន់ដា អភិបាលខេត្តកំពង់ចាម ក៏បានលើកឡើងដែរថា សមាគម និងអង្គការមិនមែនរដ្ឋាភិបាល ដែលបានបង្កើតឡើងស្របតាមច្បាប់ ត្រូវបានលើកទឹកចិត្តក្នុងការធ្វើសកម្មភាពមនុស្សធម៌ និងសេវាសង្គម ប៉ុន្តែពុំត្រូវបានអនុញ្ញាតឱ្យធ្វើសកម្មភាពណាមួយដែលមានគោលដៅបម្រើផលប្រយោជន៍ផ្ទាល់ខ្លួន ឬយកកម្រៃមកចែកគ្នានោះឡើយ។ ពោលគឺត្រូវយកចិត្តទុកដាក់ក្នុងការបំពេញកាតព្វកិច្ចឱ្យបានត្រឹមត្រូវ តាមច្បាប់ និងលិខិតបទដ្ឋានគតិយុត្តិពាក់ព័ន្ធ និងជាពិសេសចៀសវាងជាដាច់ខាតនូវការធ្វើសកម្មភាព ទាំងឡាយណា ដែលអាចជាប់ពាក់ព័ន្ធ ឬគាំទ្រដល់ការសម្អាតប្រាក់ ហិរញ្ញប្បទាន ភេរវកម្ម។
ឯកឧត្ដម កឹមរ័ត្ន វិសិដ្ឋ ប្រឹក្សាភិបាលវេទិកាសម្ព័នសង្គមស៊ីវិល បានកោតសរសើរ និងវាយតម្លៃខ្ពស់ចំពោះកិច្ចសហការល្អរវាងអាជ្ញាធរមូលដ្ឋាន និងអង្គការសង្គមស៊ីវិល ទាំងក្នុងខេត្តកំពង់ចាម និងខេត្តត្បូងឃ្មុំ ក្នុងការជំរុញការអភិវឌ្ឍន៍សេដ្ឋកិច្ច-សង្គមនៅថ្នាក់មូលដ្ឋាន ដើម្បីលើកកម្ពស់ជីវភាព និងសុខុមាលភាពប្រជាពលរដ្ឋ។ លោកបានលើកទឹកចិត្តឱ្យអង្គការសង្គមស៊ីវិលបន្តយកចិត្តទុកដាក់ និងចូលរួមអភិវឌ្ឍន៍សង្គមជាតិឱ្យកាន់តែរីកចម្រើនថែមទៀត ស្របតាមចក្ខុវិស័យ និងគោលនយោបាយអភិវឌ្ឍន៍របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ ជាងនេះទៀត ដើម្បីបង្ហាញអំពីតម្លាភាព សុចរិតភាព និងការបង្កើនទំនុកចិត្តពីសំណាក់សាធារណជននិងម្ចាស់ជំនួយ ឯកឧត្ដមបានលើកទឹកចិត្តឱ្យអង្គការសង្គមស៊ីវិលបន្តគោរពច្បាប់ជាធរមាន ដើម្បីបន្តការថែរក្សាសុខសន្តិភាព ស្ថិរភាពយូរអង្វែង និងការអភិវឌ្ឍន៍ដោយចីរភាព។ ឯកឧត្ដមបានជំរុញឱ្យអង្គការសង្គមស៊ីវិលត្រូវតែពង្រឹងសាមគ្គីភាពទាំងផ្នត់គំនិតនិងទស្សន ព្រមទាំងត្រូវបង្កើនស្មារតីស្នេហាជាតិគ្រប់មជ្ឈដ្ឋានទាំងក្នុង និងក្រៅប្រទេស ដើម្បីការពារឱ្យបាននូវឧត្តមប្រយោជន៍ជាតិ ក៏ដូចជាការការពារអធិបតេយ្យ និងបូរណភាពទឹកដី ក្នុងកាលៈទេសៈដែលកម្ពុជាកំពុងប្រឈមនឹងការឈ្លានពានពីសំណាក់ប្រទេសថៃ និងការប្រែប្រួលនៃវិបត្តិសេដ្ឋកិច្ច-នយោបាយសកល ក៏ដូចជាកត្តាភូមិសាស្រ្តនយោបាយក្នុងតំបន់។
នៅចុងបញ្ជាប់នៃកម្មវិធីតំណាងអង្គការសង្គមស៊ីវិលខេត្តកំពង់ចាម និងខេត្តត្បូងឃ្មុំ បានរួមគ្នាចេញញត្តិគាំទ្ររាជរដ្ឋាភិបាល ដោយបានបង្ហាញអំពីឆន្ទៈគាំទ្រយ៉ាងមោះមុតប្រកបដោយទំនុកចិត្តខ្ពស់ចំពោះការដឹកនាំរបស់រាជរដ្ឋាភិបាល ក្នុងបុព្វហេតុការពារបូរណភាពទឹកដី អធិបតេយ្យភាព និងឯករាជ្យភាព ក្រោមការដឹកនាំរបស់សម្តេចមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងប្តេជ្ញាបន្តចូលរួមគ្រប់កាលៈទេសៈជាមួយរាជរដ្ឋាភិបាល ដើម្បីចូលរួមថែរក្សាសន្តិភាព ស្ថិរភាព សន្តិសុខ និងការអភិវឌ្ឍន៍នៅព្រះរាជាណាចក្រកម្ពុជា។
មជ្ឈមណ្ឌលឯកសារខេត្តកំពង់ចាម ក៏បានរួមចំណែកជាមួយរដ្ឋបាលខេត្តកំពង់ចាម ក្នុងការអភិវឌ្ឍន៍មូលដ្ឋានខេត្តកំពង់ចាម ក្នុងការអភិវឌ្ឍន៍សហគមន៍ និងធនធានយុវជនតាមរយៈគម្រោងនានារបស់មជ្ឈមណ្ឌលឯកសារកម្ពុជា និងការបង្កើតវេទិកាអប់រំក្រៅប្រព័ន្ធសម្រាប់យុវជនស្វែងយល់ពីប្រវត្តិសាស្រ្ត និងសិទ្ធិមនុស្សផងដែរ។
អត្ថបទ ៖ សាំង ចាន់ធូ បុគ្គលិកមជ្ឈមណ្ឌលឯកសារខេត្តកំពង់ចាម
រូបថត ៖ បណ្ណសារមជ្ឈមណ្ឌលឯកសារកម្ពុជា
