ប្រសិនបើថៃ ដកកម្លាំងយោធាត្រឡប់ទៅកាន់ទីតាំងឈរជើងរបស់ខ្លួនកាលពីមុនឆ្នាំ២០២៥ តើនឹងមានអ្វីកើតឡើងចំពោះរដ្ឋាភិបាលរបស់ អានុទីន?
វាគឺហាក់បីដូចជាគ្មានអ្វីជាមន្ទិលសង្ស័យនោះទេ ពីព្រោះថារដ្ឋាភិបាលរបស់លោក អានុទីន បានប្រកាន់យកវិធីសាស្ត្រជាតិនិយមដោយកម្លាំងយោធា ឆ្លើយតបចំពោះជម្លោះព្រំដែន ដើម្បីក្តោបអំណាចនយោបាយរបស់ខ្លួន ហេតុនេះការដកកម្លាំងយោធាត្រឡប់ទៅវិញនឹងត្រូវក្រុមអភិរក្សនិយមថៃ ចាត់ទុកថាជាការក្បត់ឬការដកថយចេញពីគោលជំហរ ដែលផ្តល់ជាផលចំណេញចំពោះស្មារតីជាតិនិយមថៃ។ វាគឺអាចទៅរួច ដែលថារដ្ឋបាលរបស់លោក អានុទីន តាមពិតគឺមានបំណងចង់ដកកម្លាំងយោធារបស់ខ្លួនដោយសម្ងាត់ ដោយសារយល់ឃើញថាការដាក់ពង្រាយកម្លាំងយោធាទាំងនេះ ពុំបានបម្រើដល់គោលបំណងយុទ្ធសាស្ត្រយោធាចាំបាច់ណាមួយឡើយ។